اماني حسن تكتب سنه اولي جواز

نسبه كبيره من الأنفصال الفعلي أو الروحي بين الزوجين بتحصل في أول سنه جواز وده لكذا سبب :

١- سقوط الأقنعه ..

دايما كل واحد فينا ف فتره الأرتباط أو الخطوبه بيظهر أجمل مافيه علشان يصطاد التاني لكن بعد الجواز شكرا

هي تبطل تحط مكياج من بره وتوريلو الحقيقه المره وهو يبطل يحط مكياج من جوا يعني يبطل يقول كلام حب وغزل .

٢- تغيير الصور الذهنيه …

هو كان فاكر الجواز متعه جسديه وهي كانت فاكره الجواز رومانسيه وهيام لكن الواقع أن الجواز جزء كبير منه تحمل مسئوليه وتلبييه أحتياجات للطرف التاني .

٣- لو حصل حمل ف أول كام شهر بتضييع اللذه الجسديه خصوصا عند الراجل فيبتدي يبقي متوتر وعنيف مع أن المفروض يحتويها ويهتم بيها أكتر من الأول

٤- أي خلاف بيحصل بين الزوجين أول سنه بيبقي ضرب في مفهوم الحب ، يعني أزاي بيحبني مثلا ويزعقلي يبقي ماكنش بيحبني ، أزاي بتحبني وبتتخانق علي مصروف البيت ،!

٥- ليله الزفاف …

دي المفروض تكون أول نقطه بس أجلتها متعمده لكنها ف الحقيقه غايه ف الأهميه بالذات للبنت الرومانسيه اللي بتكتشف لأول مره أن حبيبها الرومانسي هو غريزي بنسبه كبيره زي كل الرجاله

فبيحصل صدمه ف أختلاف السلوك والتعبير عن الأحتياجات أول يوم..

– طب ايه الحل ؟

يجي دور الأم أنها تفهم بنتها أن الجواز مسؤليه ومسؤليه لذيذه لو حبت بيتها وزوجها

تعلمها أزاي تعرف تتعامل وتتكيف وتتعايش تحت أي ظروف تقف بجانب زوجها وتشاركه كل تفصيله في حياته بحلوها ومرها