صدى – مصر من مصر لكل العالم
الاربعة و عشرين قيراط
كتبت شيرين كمال
واحده ربنا لم ينعم عليها بالخلفه سمعت سبوع جارتها فسرحت وقعدت تتخيل انها الأم وشايله ابنها وبتقول يابختها وياريتني مكانها ..
و فى نفس اللحظه تتصل امها بيها تقولها :
عامله ايه ياحبيبتي … قلبي واكلني عليكي انتي كويسه ؟ جوزك مزعللك ؟
اعملي حسابك انا جبتلك أكلة السمك اللي بتحبيه وهنيجي ناكله سوا انا واخواتك ، فتبتسم وتمسح دموعها و تحمد ربنا وتقول الحمد لله على كل شيء
فى نفس الوقت جارتها ف السبوع شايله ابنها وسط صحباتها و عيلة جوزها
وسرحت ف ( امها وابوها الله يرحمهم ) كان نفسهم يشيلوا عيال بنتهم
فتبص فى وش ابنها الرضيع وتدمع عيونها وتقول الحمدلله على كل شيء
خليكو عارفين ان كل شخص واخد حقه في الدنيا دي
في اللي واخده مال
وفي اللي واخده بنون
وفي اللي واخده صحه
وفي اللي واخده ( أم ) لسه صوتها مبارك البيت
وفي اللي واخده ( أب ) سند ليه في عز محنته
وفي اللى واخده ( ابن ناجح )
و في اللى واخده ( زوج حنين )
و في اللى واخده ( سعاده و قناعه وراحة بال )
احمدوا الله على ما انتم فيه يزيدكم نعمه ربنا مبينساش حد ابدا و له حكمه فى كل حاجه بتحصلنا و خلو عندكو يقين انها بتكون خير لينا مهما كانت
ما تبصوش فى حياة حد … يمكن انت شايف ان ربنا مديه حاجه معينه بس مش عارف ده وراه مسؤليات ايه ولا ربنا حارمه من ايه محدش بياخد كل النعم كامله والله … احمد ربنا على اللى انت فيه علشان يزيدك و متبصش فى حياة حد ابدا هتعيش مرتاح
الحمد لله على كل حال دائما و ابدا
