حـوار صحفي مع كابتن اللياقه البدنيه منى محمود

---

اجري الحوار ياسمين يسري

في مقدمه الحوار حديثنا عن نفسك :-

**ما إسمك ؟

* مني محمود محمد السيد

مدربه لياقه بدنيه معتمد وخبره 8سنين في التدريب الرياضي

** سنك ؟

* 32سنه

**ديانتك؟

* مسلمه

**جنسيتك ؟

* مصريه

ننتقل الي باقي الحوار مع كابتن الرياضه :- كابتن مني محمود

* كيف تتعاملي مع ضغوط العمل والمواعيد ؟

الحقيقه إن الموضوع صعب مش سهل لان وقتي كله مشغول ف الجيم ويومي بيبدأ من 7صباحا وبينتهي 9مساءا وده من ناحيه  الشغل بس  وكمان واجباتي المنزليه انا الحمد لله اتعودت علي نظام  حياتي  وقدرت  بالتنظيم وبمساعدة  والدتي ربنا يبارك فيها اني اكون أد الضغط والمجهود دا

**كيف تتأكدي إن عملك دقيق وواقعي ؟؟

*بتأكد إن عملي دقيق وواقعي لما أشوف نتيجه شغلي ظهرت علي أرض  الواقع  وإن متدربه عندي تخس وتوصل لهدفها أو أن  واحده  تانيه  كانت حتي مابتقدرش تسجد ولا تركع وبقت الحمد لله بتصلي بكل سهوله وتتحرك وتدعيلي

**هل من الممكن عليكي سرد ثلاث قصص حاليه غريبه وحصلت أثناء عملك وأثرت فيكِ؟

* بصي انا قابلت في شغلي نوعيات كتير جدااا من الناس أثروا فيا واتعلمت منهم كتير بس اكتر موقف أثر فيا  وفاجئني

 لقيت مشتركه عندي  كتبالي ورقه وادتهالي كتبالي فيها أد ايه انا ساعدتها وأثرت في حياتها وخليتها تقدر تتحرك كويس وتصلي بعد تدريبي ليها وأنها بقت تدعيلي ديما

موقف تاني/ لما واحده جت قالتلي انها كانت متدمره نفسيا بسبب جسمها وان كان من أسباب انفصالها واد اي لما خست معايا دا رجعلها ثقتها

---

 بنفسها وخلاها تبدأ من جديد

موقف تالت / دا علمني كتيييير اوي  جاتلي واحده ست كبيره  واولادها كبار ومتجوزين وزنها زايد جداودا بسبب انها عمرها مافكرت في نفسها ولا صحتها وكانت بتدي كل مجهودها ووقتها لبيتها وأولادها. بعد  ماكبروا لقت صحتها ضاعت ونفسيتها متدمره بسبب وزنها الزايدومش قادره حتي تخدم نفسها بسبب تقل جسمها   واولادها اللي  ضيعت عمرها وصحتها  علشانهم مش بيساعدوها في  حاجه واترجتني جامد  اساعدها تخس علشان صحتها تتحسن وتقدر  تخدم نفسها وما تحتاجش لحد…هي للاسف  عرفت متأخر اوي أنها مهما أدت لازم تفكر  في نفسها برده  وإن التضحيه ليها حدود .

** ماهي أفضل الأساليب لديكي فى عرض محتواكي ؟

*أفضل اساليبي هو كلامي من القلب اللي بقوله فى بوستاتي علي مواقع التواصل سواء فيس او واتس او انستا أو بقوله لمشتركيني بشكل مباشر في الجيم علشان احمسهم وازود ثقتهم بنفسهم وتخليهم واثقين أنهم قادرين يوصلوا لهدفهم

** كيف تتعاملي مع الشخص غير المتعاون؟

* اتعلمت من شغلي أن اي انسان ف الدنيا له مدخل اقدر ادخله منه فأي حد بتعامل معاه بحاول افهم الطريقه اللي هو بيحبها وعلي طول برضله واخليه يتعاون معايا وطبعا قبل كل دا لازم ابني الثقه بيني وبينه علشان يتقبل مني دا

**هل أنتي علي استعداد للسفر دائما ؟

*والله ممكن قبل كده كنت مستعده للسفر وكمان بتمناه …بس حاليا بعد ما بقي عندي مكاني الخاص اللي أسسته بتعبي ومجهودي وكمان عندي ولاد صغيرين محتاجين وجودي جنبهم كل ده خلاني شيلت فكرة السفر وركزت مجهودي في بلدي أحسن

**كيف تتوقعي ان يصفك صديقك المقرب ؟

*بصراحه انا مش محتاجه أتوقع لانهم دايما بيقولولي الكلام ده علي طول أني طيبه أوي وصافيه ودايما بٱجي علي نفسي وعلي صحتي عشان  أرضي الناس وما حدش يزعل مني

**ما الذي تحبيه في نفسك ؟

*بحب فيا حرصي علي الناس اللي معايا واصراري اني أساعدهم واوصلهم للي هما عاوزينه …بحب شغفي بمجال الرياضه ومتابعتي للجديد فيها ..بحب فيا اني بقدر أقوم تاني بعد كل وقعه وارجع أحسن وأقوي من الاول

**كيف تبقين نفسك مرتبه ؟

*الحمد لله أنا من الناس اللي بحب آخد بالي من شكلي وبحب أدلع نفسي وبعمل أي حاجه تساعدني اني ابقي دايما شكلي حلو عشان أبقي قدوه كويسه لمشتركيني

**ما الامر الذي يشعرك بعدم الارتياح؟

*ان أوقات كتير بضطر أتعامل مع ناس أنا مش متقبلاها ولا هما شبهي في أي حاجه بس ماأقدرش اني أبين ده ولا أقصر معاهم في أي حاجه  وبفصل بين الشغل وبين المشاعر دي

**أين تري نفسك بعد ٥ سنوات ؟

*طبعا ما حدش ضامن عمره بس تقدري تقولي ان ده حلمي …ان أبقي في جيم أكبر واوسع مجهز علي أحسن طراز واني أبقي مؤثره في الناس  أكتر وأقدر أساعد ناس أكتر باذن الله

**ماهي البيئه المناسبه للعمل بالنسبه لك؟

*البيئه اللي فيها روح الفريق…فيها كل واحد بيؤدي دوره وبيخاف علي مصلحة الشغل والمكان وزملاؤه لأن التعاون بين الفريق هو اللي بيوصل العمل  انه ينجح ويكبر وفي نفس الوقت بيوصلنا   نكسب أصحاب وأخوات .

**هل تعتبر نفسك قياديا أم تلميذا؟

*بعتبر نفسي قياديه في مواقف وتلميذه في مواقف تانيه وفي كل الاحوال بتعلم برده حاجه جديده  ومش عيب اننا نتعلم لان دا اللي بيصنع مننا اشخاص ناجحه  ديما  .

**كم تتوقع ان تعمل في هذا المجال؟

*والله دي حاجه في علم الغيب لكن أنا فعلا بحب المجال ده ومتميزه فيه بشهادة كل الناس وشايفه نفسي بحقق فيه خطوات كويسه فطول ما انا  قادره أدي وأجدد هستمر بإذن الله.

**ماهي خطتك للتطور في المرحله القادمه ؟

*ان شاء الله ناويه أدخل أنشطه رياضيه جديده وأبدأ كلاسات جديده أول مره تتعمل في البلد وفي نفس الوقت هطور المكان نفسه وأزود فيه ادوات وأجهزه جديده.

**ما هي الصفات والسمات التي تتمني ان تمتلكها ؟

*بتمني إني أقدر أبقي أقوي في مواجهة الناس اللي بتأذيني وبتحاول تأثر علي شغلي وعلي حياتي وكمان الناس اللي بتبتزني عاطفيا .

**هل تحبذي العمل بمفردك أم مع فريق ؟

*في فتره من حياتي كنت احب أشتغل غير لوحدي …كنت برفض وجود اي حد معايا لكن حاليا بعد ما جربت الفريق في مكاني (كيرفي چيم ) بقيت بفضله أكتر لانه بيوصل لنتايج أحسن وده النظام اللي هستمر عليه ان شاء الله.

**ما الإنجاز الذي تفخري به؟

*الإنجاز بتاعي هو (كيرڤي چيم )…مكاني اللي أسسته من الصفر وتعبت أوي لحد ما كبر وبقي مكان الناس بتجيله مخصوص  وهفضل أشتغل  فيه اكتر واتعب أكتر عشان يبقي أكبر ويساعد كل الناس اللي بتجيله …وعاوزه أقولك ان اي

حد بييجي كيرڤي جيم بيعتبره بيته وإننا أخواته قبل ما نكون مدربينه .

**من هم قدوتك في الحياه في مجال الرياضه واللياقه البدنيه؟

*فيه ناس كتير كان لهم فضل في تعليمي ومساعدتي إني أبقي مدربه قويه منهم أساتذتي في الكليه والمدربين اللي إشتغلت معاهم واتعلمت منهم في الأماكن اللي اشتغلت فيها لكن بصراحه قدوتي الحقيقيه في كل حياتي واللي ساعدتني ووقفت جنبي في كل خطواتي واللي اناعمري ما كان يبقي ليا اسم او وجود من غيرها هي والدتي ربنا يبارك فيها ويجازيها كل خير عني وعن ولادي

سررت بحوارك جدا .. وبذلك نكون ختمنا حوارنا، واستمتعت كثيرًا مع محادثتكِ ، ودائمًا في تقدم إن شاء الله كابتن منى