يوحنا عزمي يكتب إنعدام الشغف إتجاه وظائفنا
يوحنا عزمي يكتب إنعدام الشغف إتجاه وظائفنا
بقلم يوحنا عزمي
اعتقد في رأيي الشخصي إن جزء كبير من سبب الفساد
في الدولة والمجتمع ، مقصدش الفساد في العمل الحكومي اقصد الفساد وتردي الوضع العام
عامة سببه إن الناس مش بيدوا قيمة للحاجة اللي شغالين فيها ، مش هقول ضمير ولكن مفيش شغف ،
لا وجود لإحساس المتعة وانت شغال.
يعني مثلاً بشوف فيديوهات من دول اجنبية العامل اللي بيصلح فيها الطريق – النقر بقا البلاعات
الشروخ .. الخ ، لابس يونيفورم معين وفي سن الشباب وبيعمل شغله وهو بيصوره بمُنتهى الدقة
والإحترافية ، تحس إنه حابب الشغل اللي بيعمله ، كذلك الامر مع عامل الصيانة سباك بقا كهربائي
ميكانيكي بنا وغيره وغيره ، كلهم بيصوروا شغلهم ومراحل التنفيذ الدقيقة اللي فيه والنتيجة النهائية
وبحس إنهم بيبقوا مبسوطين وهما بيعملوه.
صحيح إحنا عندنا في مصر فيه ناس كدة ، بس السواد الاعظم لا ، الكل بيقضي وقت وخلاص ، بيعمل الروتين وما بيصدق يخلص عشان يمشي يروح ينام بقا او يقعد على القهوة او ايا كان ، ناس كتير مش بيحبوا شغلهم ، صحيح ممكن تكون بيئة العمل مش احسن حاجة ، وممكن برضه الشغل ده يكون اتفرض عليا ومش ده اللي انا عاوزه ، بس للأسف جاس وات؟!
هي دي الدنيا ، لو هنمشي نندب حظنا كل دقيقة مش هنحقق حاجة ، وعشان تعمل الشغل اللي انت بتحبه لازم الاول تحب الشغل اللي انت فيه وتحاول تتميز فيه وتعمله بشغف واتقان
لما تتعود علي كدة وتعود نفسك على كدة هتكسب من شغلك الحالي ، ووقتها هتقول لنفسك طب شوف يا اخي انت لما حطيت دماغك في حاجة واسمك مش عاوزها عملت ايه؟ اومال بقا لما تشتغل الشيء اللي انت بتتمناه او بتحبه فعلا هتكون ايه النتيجة.
قطاعات كتير جدا في مصر هتتحسن وهتتغير 180 درجة
لو بقى عندنا الثقافة دي ، لو بس كل واحد في المكان اللي هو فيه حبه او حد ادنى قبله وحاول يقدم فيه حاجة ، بس ده هيحصل إزاي والمُجتمع خالق فروقات ملهاش اول من اخر بين نوعيات العمل المُختلفة ؟!
مع ان حرفيا لو بصيت وركزت هتلاقي إن مفيش منطقة
او مدينة في اي مكان في العالم تقدر تستمر بسكانها بدون سباك او كهربائي او ميكانيكي مثلاً ، اللي هي برضه نفسها الشغلانات اللي ناس كتير بتحتقرها وبتقلل منها ، احنا اعداء نفسنا والله.
