الله وكفي

الله وكفي

بقلم  أماني حسن

فى فترة من حياتك بتتفاجىء بتصرفات الناس حواليك ..

وشوش بتتلون .. وكلام بيتغير .. وعشرة بتهون ..

ناس تظهر فجأة تكركب حياتك وتمشى ..

وناس عشرة عمر تبيعك فى كلمة ..

وتلاقى نفسك واقف لوحدك ! 

لا انت عارف ترجع زى زمان ولا انت قادر تكمل كده .. 

وتسأل نفسك طيب كان ليه كل دا ما أنا كنت كويس الاول .. ليه الناس دى جت وليه مشت؟!! 

أكيد فى درس كان لازم تتعلمه وعمرك ما كنت هتتعلمه غير كده .. ان 

“كل اتكاء على غير الله عرج ” 

استمد قوتك من الناس وهتعيش ضعيف ..

استمد سعادتك منهم وهتعيش تعيس .. 

الناس بتتغير مشاعرها وأفكارها واولوياتها .. 

اللى وعد ممكن يخلف .. واللى سندك فى يوم مش هيسندك طول عمرك .. 

واللى ارتاح معاك يوم ما يلاقى الأحسن منك هيسيبك .. 

واللى عرف نقطة ضعفك جايز يوجعك بيها ..

واللى قال انه اكتر حد حاسس بيك دا اول واحد هيجرحك .. 

الناس أمان مؤقت ..

لكن ربنا مش كده .. بيسمعك وبيحبك ويقبلك ..بيعرف نقط ضعفك ويسترها..

بيشوف وجعك فين ويجبره ..

ربنا هو الأمان الدائم ..

وفى عز ما انت بتغلط هيقولك بابى مفتوح .. 

ويوم ما تضيق عليك بيخفف عنك مش بيسيبك ويمشى .. 

سبحانه ماهو من اسمائه “الرفيق” 

رفيق بجد .. مش زى اللى فى الدنيا 

مش بقول اننا نقاطع الناس وننعزل او انهم وحشين .. بالعكس فى ناس كويسة جدا حبهم بس علق قلبك بالله .. علشان يوم ما يمشوا متتكسرش ..

“أحبب من شئت فانك مفارقه ” ..هى دى الدنيا كله بيفارق .. فاختر رفيق لا يفارق