اللاعب الثالث اللي ممكن يستكمل نفس المسيرة خلف صلاح و عمر مرموش هيبقي مصطفى محمد لكن بشرط إنه يخرج من بيئة نانت الفرنسي ، كل دقيقة مصطفى بيلعبها مع نانت تضيع وقت النادي فقد المنافسة من بدري ومش منافس أصلا
نادي نانت حاليا في المركز ( 14 ) ما بينه وبين مراكز الهبوط مركز اخر 8 مباريات إما تعادل أو هزيمة بجانب أسوء مشكلة في التيم مدربهم الفرنسي ” أنطوان كومبواري “
المدرب ضد مصطفى محمد في كل حاجة
– عاقب مصطفى محمد علي صيام رمضان وكان مستبعد
– عاقب مصطفى محمد لما رفض يشارك في مباراة دعم اسوء فئة طبعا انتوا فاهمين قصدي
– عاقب مصطفى محمد ورفض رحيله لنادي ليستر سيتي بدون سبب بحجه انه محتاج مصطفى بالرغم ان المشاركات كانت قليلة تماما
مصطفى لازم يفكر في الخطوة القادمة إما يشوف نادي كويس في الدوري الفرنسي زي موناكو أو مارسيليا أو يخرج برا الدوري الفرنسي
هيبقي قرار موفق وأتمنى يشوف البريميرليج لازم وكيله يوفرله عرض جيد ، مصطفى حاليا 26 عام لازم يطمح في تجربة تنوره مرة تانية
مصطفى محمد شخص كويس محترم بشهادة مدربين كتير كل حاجة وحشة اتقالت عن مصطفى بغرض التريند كانت كذب وظلم .
بالمناسبة رحلة مصطفى مفهاش رفاهية بالبلدي كدا جايبها من تحت أوي طنطا للزمالك لتركيا قدم فترة محترمة للدوري الفرنسي أرخم دوري خاصة للاعبين المسلمين .
مصطفى لما سافر فرنسا أول حاجة أتعلم اللغة علشان يقدر يتأقلم مع اللاعبين و كان عايش حياه كلها انضباط و إصرار
البداية كانت قوية مساهمات تهديفية جيدة لكن الفترة الأخيرة الوضع أختلف بسبب قله المشاركات ووضع الفريق بشكل عام .
