مين كسر مناخير ابو الهول

كتب / اسامة عبدالخالق

طبعا كل الناس بتقول انه نابليون بونابرت لما دخل مصر

و ده طبعا غير صحيح على الاطلاق لان الرسوم اللى صنعها المستكشف

الدانمركي فريدريك لويس نوردين لـ أبو_الهول في عام 1737 م ونشرت

في 1755 م في كتابه ( الرحلة إلى مصر و النوبة ) توضح التمثال من غير

مناخير يعنى كانت مناخيره مكسورة قبل ما ييجى نابليون باكتر من 50 سنة

اللى كسر مناخير ابو الهول المتصوف محمد صائم الدهر اللى كان عايش

قريب من الاهرامات و كان ابو الهول وقتها متغطى بالرمال مش باين منه

غير راسه لحد اول دقنه بس و محمد صائم الدهر و جماعته شايفين انه

صنم لازم يتكسر و كان كل فترة يخطب فى الناس عن ضرورة تحطيم الصنم

لحد ما جمع اتباعه فى يوم عام 1381 و خرجوا لتحطيم الصنم و وقفوا امام

التمثال و بدأوا يكسروا فيه بفئوسهم و معاولهم من شروق الشمس لحد

بعد العصر و ما كسروش منه غير مناخيره و جزء من فمه و فى الاخر تعبوا و مشيوا

يومها عرف الظاهر سيف الدين برقوق اللى كان وقتها الوصى على عرش

السلطان الصالح صلاح الدين حاجى

فلما عرف الامير برقوق امر بالقبض على صائم الدهر و طريقته و سجنهم

و مات صائم الدهر فى السجن و بعدها باشهر اصبح الامير برقوق سلطان

على مصر و هو السلطان الظاهر سيف الدين برقوق

المصادر :

المواعظ والاعتبار بذكر الخطط والآثار – للمقريزى

الخطط التوفيقية – لعلى باشا مبارك