ازنيف غزاله تكتب السر المخفي
بقلم ازنيف غزالة
شويه هدوء و ادخل و اقفل باب الغرفة عليك و انعزل عن العالم الخارجي بكل تفاصيله و مشاكله و تعالي نتكلم و نشيل الماسكات
اللي على وشوشنا المجهده التعبانه.
نشوف ملامحنا صح بكل تفاصبلها بدون تجمل و الماسك اللي بنداري حزننا و ضعفنا عن كل اللي حوالينا.
نجرب كده مع بعض علاج جديد…
اسمع بقي مني الخلاصة.
الناس اللي نفسها تعيط و مكسوفة دموعها تنزل قدام حد و كاتمه في نفسها و ساكتة و قلبها بيتقطع من جوه, سيان بقي الدموع
ديه بخصوص ايه او ايه المشكلة اللي وصلتهم لكده, و عايشين على المهدئات و المسكنات بسبب قلة النوم.
احب اقول لكل واحد ادخل غرفتك واصرخ وابكي وطلع شحنة الغضب اللي جواك. مش عيب انك تعيط .
و اوعي تفتكر ان ده ضعف منك, خالص ده قمة القوة.
عارف ليه!!
لان انت بتواجه احزانك اللي جواك بنفسك, مش محتاج حد يساعدك تطردها.
وان صح التعبير خليك انت طبيب الروح لنفسك.
لان ببساطه انت عارف حالتك بالضبط وبالتالي هاتعرف تعالج نفسك من كل مشاعر الحزن والغضب.
احنا للاسف مش بنواجه أنفسنا, لأننا دايما بنجري مفيش فرصة نقعد مع نفسنا علشان ننضف الكلاكيع و الشوائب اللي جوانا اول باول.
ايقاع الحياه بقي سريع جدا. وانا معاك في ده, بس هقولك سبب واحد يخليك تقف شويه تفكر في نفسك.
تعالي كده و تخيل معايا انت جريت و اخدت كل حاجة بتتمناها من الدنيا. الدنيا هتسيبك في حالك كده!!
الدنيا زي ما بتديلك امنياتك, في فاتورة انت لازم تدفعها.
ممكن تدفعها بقي من صحتك ومتعرفش تتمتع باللي معاك, و ممكن تدفعها من حاجات تانية مفيش داعي لدخول في تفاصيلها.
مفيش حد أخذ من الدنيا بدون مقابل.
فكر في كلامي كويس اوعي تفتكر ان في سعادة متناهية, لما تحقق امنياتك كلها هاتوصل للسعادة, انسى,
كان اغنى الاغنياء زمانهم الارض مش شايلاهم من التكبر على الخلق.
هتلاقي في شوكة كده لازم تنغص عليهم حياتهم.
مفيش انسان على وجه الكرة الأرضية معندوش مشكلة وجعاه و قطمه وسطه.
بس في ناس فهمت الحياة صح, متقبله السعادة و الحزن.
هي ديه الضريبة اللي كل انسان لازم يدفعها, فحاول تقبل فكرة السعادة و الحزن.
زي ما هتيجى عليك ايام هتطير من الفرحة هتيجي عليك ايام حزن هاتبقي عايز تولع في نفسك.
و برغم كل ده الحياة ماشية وإنت لسه عايش و مولعتش في نفسك ولا حاجة.
عيش الحياة بحلوها و مرها و زي ما هيجى عليك أيام ليل هايجي عليك نهار مشرق جميل.
